Reportaxe realizada pola Televisión de Galicia co gallo da celebración anual dos Encontros de Panxoliñas que organiza Follas Novas, desde 1990.

Tamén, por suposto, ás persoas que nos acompañáchedes onte, porque a curiosidade que demostráchedes por coñecer este anaco de terra e o respecto co que vos achegastes a ela e ás súas xentes son, xunto con estas imaxes, o mellor recordo que gardamos desta xornada, e o que nos anima a ir pensando na próxima!

Pero antes desta viaxe musical ás illas británicas, faremos outra máis próxima, pero non por iso menos emocionante. Ás 16:30 horas saímos a pé do convento de Herbón para camiñar xuntos un anaco parando na igrexa parroquial de Santa María de Herbón, xoia románica da segunda metade do s. XII. Baixaremos á beira do Ulla para coñecer as pesqueiras de lamprea e tamén, como non, algunha plantación de pementos que nos quede no camiño de volta ao convento.

Nestes lugares, e nalgún outro que reservamos en segredo, teremos a sorte de atopar a veciños e veciñas destas terras que, nestas paradas, nos han falar destes espazos, de arte, de arquitectura, da pesca no Ulla, do cultivo do pemento e de horta, das iniciativas que se están levando adiante na casa franciscana de Herbón, entre eles a do hospital de peregrinos da Asociación Galega de Amigos do Camiño.

Unha oportunidade única para que os que non coñecedes estes espazos e os proxectos de futuro que esconden vos achegedes a eles por primeira vez, pero tamén para todos os que os cremos coñecer, porque sempre atoparemos alguén que, no camiño, nos descubra novos mundos dentro daquel que temos máis próximo.

Se vides camiñar con nós non esquezades traer un calzado axeitado e moitas ganas! O camiño non será longo -aproximadamente 2.5 quilómetros- pero asegurámosvos que vai dar para moito!!

Para convencervos aínda máis deixámosvos un vídeo promocional no que poderedes ver algunhas das imaxes da edición de Espazos Sonoros de 2010 e do seu paso por Herbón:

Esperámosvos este sábado día 2 ás 9.30 da mañá na área do Bosque, en Dodro. Podedes traer algo para o xantar (comeremos ao rematar a xornada), auga, botas para a lama, sombreiro para o sol… e todo o queirades pero principalmente moitas ganas de andar (son aproximadamente uns 10 quilómetros) e de coñecer as brañas!! Remataremos a xornada a iso das 14.30 horas. Se aínda non estades convencidos/as deixámosvos esta ligazón para que poiades descargar unha fermosísima guía editada por Verdegaia na que atoparedes moita información sobre as brañas de Laíño, un dos espazos húmidos máis extensos, descoñecidos e de maior valor ambiental do noso país, e non só pola súa biodiversidade, tamén pola súa historia e etnografía. E para convencervos aínda máis tamén vos deixamos imaxes da primeira visita ás brañas, o 3 de xullo de 2010. Ah! e se aínda vos quedan dúbidas, xa sabedes que podedes chamarnos ao 617 260 670 para resolvelas todas, ou mandarnos un correo electrónico a sementar@gmail.com.

Terceira xornada, para as persoas que asistíchedes á primeira e á segunda, o vindeiro sábado 30 de abril a partir das 10.00 da mañá.

Segunda xornada, para as persoas que asistíchedes á primeira, o vindeiro sábado 9 de abril a partir das 10.00 da mañá.

A recuperación dos bens artísticos do convento de Herbón foi unha das liñas de traballo que trazamos no proxecto de Sementar. Nela, situamos o obradoiro de restauración de arte que comezaremos durante a primeira quincena de marzo (coa data aínda pendente de confirmar).

O noso amigo Javier Tembra, un bo coñecedor das técnicas de restauración de arte, achegaranos nunha primeira xornada unha serie de coñecementos teóricos sobe esta disciplina. Falaranos das técnicas, dos materiais, de como foron cambiando certas prácticas ao longo do tempo, de como identificar os problemas concretos que pode presentar unha peza… Ao remate desta primeira parte, analizaremos e valoraremos con el o estado de conservación das tallas que se atopan no claustro vello do convento, as primeiras que trataremos de recuperar. Será baixo a súa dirección e coa axuda daquelas persoas que, logo desta primeira xornada, amosen o seu interese por asistir a novas convocatorias deste obradoiro.

Se che gusta a arte e queres aprender algo sobre estas técnicas e colaborar con nós na recuperación do patrimonio desta casa, déixanos un correo en sementar@gmail.com ou danos unha chamada ao 617 260 670. Acabamos de confirmar a data deste primeiro encontro, que será o vindeiro sábado día 5 de marzo a partir das 10:00 da mañá (ata o mediodía).

Trátase dunha agrupación vocal a cappella que utiliza o teatro e a performance para cantar en calquera situación e lugar. O repertorio musical vai do soul, ao funky, pasando polo gospel, samba, calipso e ata a dance-music.

A Rá é o coro residente da escola de música Estudio, de Santiago de Compostela. Foi fundado no ano 1993 polo que é o seu director desde entón, Ramón Bermejo e conta cun cadro de 60 voces mixtas formado por cantantes profesionais, músicos, actores, fotógrafos, estudantes, ensinantes, funcionarios, autónomos, desempregados e un químico.

Nos últimos tempos a súa actividade foi multiplicándose, abarcando galas, concertos, performances, concertos didácticos, gravacións, curtametraxes e spot comerciais.

A característica que diferencia a este coro doutros son as súas intervencións, chamadas “Concertos Comando”. Trátase de breves actuacións que teñen lugar de xeito espontáneo e por sorpresa en calquera lugar ou situación: pola rúa, nun mercado, nunha rolda de prensa, nun concerto, etc. Ao aspecto musical engádense elementos teatrais: pequenos sketches, accións extravagantes e a caracterización dos cantantes. Iso multiplica o entretemento e aumenta a conexión co espazo no que se realiza a acción. O resultado é a sensación de que a música está a xurdir da realidade de maneira espontánea.

Sobre estes ‘Concertos Comando’ tedes boas mostras na rede, pero se o que queredes e gozar xa do espectáculo que ofrecen en directo estes homes e mulleres non tedes máis que achegarvos o sábado a Herbón. Contamos con vós como sempre!

(Concerto de Nadal 2008 /Concerto de Nadal 2009)

Esta actuación enmárcase no ciclo Espazos Sonoros, que recunca en Herbón trala xornada que tivo lugar en setembro, de camiñada a través do tramo do Camiño de Santiago onde conflúen o Camiño Portugués e a Ruta do Mar de Arousa e Ull cun peche final coa música e danza barroca da man do grupo Silva de Sons e dos bailaríns Eva Narejos e Juan Jesús García. Daquela xornada gardamos moi bos recordos e este sábado agardamos repetir a experiencia. Velaquí algunhas imaxes cedidas por Espazos Sonoros do que foi aquel día. Agardámoste o sábado!

Se vos apetece vir a esta xornada lembrade que para apuntarvos podedes mandar un mail a sementar@gmail.com ou chamarnos ao 617 260 670. O prezo da actividade é de 5 euros para as persoas que non son socias de Sementar.

E como unhas portas sempre abren outras, a tamén directora artística de Espazos Sonoros marchou pensando na posibilidade de engadir o nome de Herbón no listado dos 21 espazos do patrimonio cultural galego que nesta nova edición do programa se transformarán en auditorios privilexiados nos que actuarán ata 26 formacións musicais do máis variado (música de cámara, antiga, vocal…).

Supoñemos que probas de que esta igrexa tamén pode ser un magnífico espazo para a música non deberon faltar (para mostra as nosas anteriores experiencias en 2008 e 2009), pois esta mañá alegrámonos moito de saber que a programación de Espazos Sonoros ten reservadas dúas actuacións en Herbón! e outra máis en Iria Flavia!

Aquí van as datas dos concertos para que vaiades tomando nota:

• Sábado 18 de setembro: Silva de Son e danza, 20.00 horas (igrexa do convento de Herbón)
• Venres 15 de outubro: Andrés Cea Galán, 20 horas (ex-colexiata de Iria). Esta actuación será despois dunha charla sobre o órgano de Iria Flavia e dunha visita guiada a cargo de Andrés Díaz, que tamén é profesor de música e compoñente do grupo Xograresca.
• Sábado 30 de outubro: Wilbert Hazelzet e Harmonía Artificiosa, 20.00 horas (igrexa do covento de Herbón)

Para a primeira destas actuacións Espazos Sonoros contará coa colaboración dos nosos amigos da Asociación Galega de Amigos do Camiño de Santiago, xa que está concibida como algo máis que un concerto. Será unha xornada de camiñada a través do tramo do Camiño de Santiago onde conflúen o Camiño Portugués e a Ruta do Mar de Arousa e Ulla e que rematará en Herbón, onde AGACS ten o Hospital de peregrinos de Santo Antonio, cun concerto de música e danza barroca da man do grupo Silva de Sons e dos bailaríns Eva Narejos e Juan Jesús García. Para esta actividade é preciso inscribirse previamente (do 3 ao 15 de setembro) en actividades@espazossonoros.org

Ide tomando nota!